Manchester United hefur tekið ákvörðun um að Erik ten Hag verði næsti knattspyrnustjóri félagsins. Fjöldi miðla hefur sagt frá.
Sagt er að United vilji ganga frá ráðningunni sem fyrst í þeirri von um að geta farið að huga að leikmannamálum.
Jamie Carragher sérfræðingur Sky Sports fagnar því að United taki þessa hugrökku ákvörðun og hann vonar að Ten Hag verði hugrakkur í starfi.
„Þetta er val sem ber merki um hugrekki, United þarf að taka hugrakkar ákvarðanir. Það þarf líka að taka hugrakkar ákvarðanir með leikmenn og láta Pogba og Ronaldo fara,“ segir Carragher.
Carragher leggur til að United losi sig við Ronaldo í sumar en ljóst er að Pogba fer enda samningslaus.
„Það hefði verið auðveldara að velja Pochettinho því hann þekkir ensku deildina. Þeir hafa iðulega valið þekktara nafnið í starfið.“
