Bruno Lage, knattspyrnustjóri Wolves, segir Ruben Neves, leikmann liðsins 100 milljóna punda virði.
Samkvæmt Daily Mail er Neves eftirsóttur af mörgum af stærstu félögum Evrópu, þar á meðal Barcelona, Manchester United og Liverpool.
Núverandi samningur Neves hjá Wolves gildir til ársins 2024. Portúgalinn hefur skorað fjögur mörk í 31 leik fyrir félagið á tímabilinu.
„Ég veit ekki hvort það er Man United eða önnur félög en ég veit að Ruben er mjög einstakur leikmaður.“ sagði Lage, stjóri Wolves. „Hann hefur verið að gera mjög góða hluti á tímabilinu. Ég held hann henti líka leikstíl okkar vel og lyfti liðinu upp á hærra plan.“
„Það er best að hækka slíkan leikmann í launum og framlengja samningi hans. En hver veit, lið eru reiðubúin að borga 100 milljónir punda fyrir leikmann eins og hann.“
Neves kom til Wolves á 16 milljónir punda frá Porto árið 2017 og hjálpaði liðinu að vinna ensku B-deildina á sínu fyrsta tímabili. Hann er að glíma við meiðsli þessa stundina en Wolves situr í 8. sæti deildarinnar fyrir leikinn gegn Newcastle á föstudag.
