Íslenska kvennalandsliðið í knattspyrnu vann í dag yfirburðarsigur á Hvíta-Rússlandi í undankeppni HM 2023. Leikar enduðu með 5-0 sigri Íslands en leikið var á hlutlausum velli í Belgrad. Sigurinn kemur Íslandi í efsta sæti riðilsins.

Tvær íslenskar landsliðskonur, þær Glódís Perla Viggósdóttir og Dagný Brynjarsdóttir, léku í dag sinn 100. A-landsleik fyrir Íslands hönd.

Það var Dagný  sem kom Íslandi á bragðið í leiknum með marki á 14. mínútu eftir stoðsendingu frá Gunnhildi Yrsu.

Eftir þetta mark litu íslensku stelpurnar aldrei til baka. Gunnhildur Yrsa tvöfaldaði forystu Íslands með marki á 24. mínútu eftir stoðsendingu frá Berglindi Björgu Þorvaldsdóttur og aðeins einni mínútu síðar bætti Berglind við þriðja marki Íslands. Hreint út sagt frábærar mínútur hjá íslenska landsliðinu.

Fleiri mörk voru ekki skoruð í fyrri hálfleik og því fór Ísland inn til búningsklefa með örugga forystu.

Aðeins þrjár mínútur höfðu liðið af seinni hálfleik þegar að Karólína Lea Vilhjálmsdóttir bætti við fjórða marki liðsins með marki beint úr aukaspyrnu og Karólína var síðan aftur á ferðinni á 57. mínútu þegar að hún bætti við fimmta marki Íslands.

Skömmu síðar fór Karólína af velli og inn á í hennar stað kom Sara Björk Gunnarsdóttir sem sneri aftur í íslenska landsliðið eftir barnsburð. Þetta var fyrsti landsleikur hennar síðan í desember árið 2020.

Hvít-Rússar réðu ekkert við íslenska landsliðið og fleiri mörk voru ekki skoruð í leiknum sem lauk með öruggum 5-0 sigri Íslands.

Ísland kemst með sigrinum upp í 1. sæti riðilsins þar sem liðið situr með 12 stig eftir fimm leiki og einu stigi meira en Holland sem er í 2. sæti.

Næsti leikur Íslands er gegn Tékklandi á þriðjudaginn kemur.