Það var mikið fjör á Hlíðarenda í kvöld þegar Valur tók á móti KR í stórleik í Bestu deild karla.
Valur fór með 2-1 sigur af hólmi í skemmtilegum leik. Kjartan Henry Finnbogason kom KR yfir á 18. mínútu. Patrick Pedersen jafnaði fyrir heimamenn undir lok fyrri hálfleiks. Það var svo Jesper Juelsgard sem gerði sigurmarkið þegar 20 mínútur lifðu leiks.
,,Geggjaður sigur. Þetta er perfect byrjun á þessu móti, vinna tvo ágæta leiki og svo KR á heimavelli,“ sagði Aron Jóhannsson, framherji Vals, við 433.is eftir leik. Valur er með fullt hús stiga eftir þrjá leiki.
,,KR voru aðeins sterkari en við í byrjun. En þetta var hörkuleikur, geggjað að fá þrjá punkta í lokin.“
Aron hefur ekki enn tekist að skora fyrir Val í Bestu deildinni en það truflar hann ekki. ,,Nei, núna hjá mér snýst þetta bara um að vinna leiki.“
Framherjinn varð pirraður í seinni hálfleik og uppskar gult spjald. Hann var spurður út í þetta. ,,Við setjum boltann út af þegar einn liggur hjá okkur og búumst náttúrulega við því að þeir setji hann til baka á okkur. Svo er þetta bara smá æsingur.“
,,Þetta er Valur-KR, stærsti leikur á Íslandi. Það á að vera hiti í þessu,“ bætti Aron við að lokum.