Rætt var um íslenska karlalandsliðið og æfingarleikina gegn Finnlandi og Spáni í íþróttavikunni með Benna Bó sem er á dagskrá Hringbrautar alla föstudaga klukkan 21. Margrét Lára Viðarsdóttir, sérfræðingur um fótbolta, sat í settinu með Herði Snævari Jónssyni, íþróttastjóra Torgs en þau voru sammála að ungu guttarnir sem hafa tekið við þurfa að stíga upp og taka að sér leiðtogahlutverkið.
„Ég held að við þurfum að fara bakka út úr þessari gleði að við séum að fara inn í alla leiki til að fá einhver úrslit. Óháð þeim vill maður fá frammistöðu og ég held að það sé svolítið sem maður saknar. Að menn hafi trú á verkefninu og fari inn í leikina og gefi allt með gömlu góðu baráttuna. Nú er ég ekki að segja að þeir séu ekki að því en maður vill sjá þá aðeins rífa upp vinnuhanskana og hjálpa hvor öðrum. Leggja sig 100 prósent fram þó þeir séu að reyna að gera sitt besta,“ segir Margrét.
Hún benti á að ótrúlega margt hafi breyst á stuttum tíma og vitneskja og þekking sé horfinn úr klefanum og líka utanvallar. „Það verður erfitt að fylla þau skörð en við þurfum að gefa strákunum tíma og þolinmæði því þeir eru hæfileikaríkir og þegar þeir finna taktinn þá förum við að sjá betri frammistöður og úrslit,“ segir hún.
Hörður benti á að þetta hefði verið framhald frá síðustu leikjum. „Ég er ekki viss að við sjáum þetta batna mikið á næstunni. Það eru margir leikmenn með fáa landsleiki og sumir ekki nógu góðir til að spila fyrir landsliðið en svona er bara staðan í dag.“
Hann benti á að það væri ekki gott að byrja í nýju liði og það væri alltaf tap í kortunum. „Við þurfum að fá trú og vonandi gerist það í sumar gegn Albaníu og Ísrael.“
Margrét saknar leiðtoga í liðinu enda margir reynslumiklir menn horfnir á braut. „Það er svo mikilvægt þegar menn geta skipt með sér verkum og hlutverkum. Leiðtoginn finni að það sé líka verið að hvetja hann og manni finnst eins og það vanti að þeir séu að stíga upp og taki við keflinu. Það skiptir engu máli hvort þeir séu búnir að spila fimm eða 20 landsleiki. Þeir eru komnir og eru að spila fyrir A-landsliðið og þetta er svo mikilvægt. Við höfum alltaf, íslensk landslið, farið langt á baráttunni og hugarfarinu, kraftinum og samstöðunni. Það er það sem maður vill sjá skína skærar hjá liðinu.“
Hörður benti á að KSÍ hefði ekki mátt leyfa sér þann munað að losa alla þekkingu utan vallar. „Það er eiginlega bara glæpur. Ég held að það séu stærstu mistökin að leyfa Frey Alexanderssyni að fara úr Laugardalnum. Hann þekkti kvennastarfið út og inn og karlamegin líka. Þar var lykilmaður að halda þessu gangandi.“
Nánari umræðu um landsliðið má sjá hér fyrir neðan.
