Ummæli Söru Bjarkar Gunnarsdóttur um Evrópumótið í knattspyrnu í vikunni vöktu heimsathygli. Rætt var um málið í Íþróttavikunni hjá Benna Bó á Hringbraut þar sem Arnar Daði Arnarson þjálfari Gróttu og Arnór Smárason leikmaður Vals voru gestir.

„Ég fékk þann heiður að fara á EM kvenna í Hollandi, þar spiluðu þær á þremur glæsilegum völlum. Sérstaklega í Rotterdam, ég man þegar við vorum þar þá var komið í ljós að EM væri á Englandi. Ég held að hvergi hafi sést að það ætti að spila á kvennaleikvangi Manchester City. Auðvitað eru þetta vonbrigði en að sama skapi er þetta löngu komið til kastanna, frekar seint í rassinn gripið að tala um þetta núna. Löngu orðið uppselt,“ sagði Arnar Daði um málið.

Uppselt er á fyrstu tvo leiki Íslands sem fram fara á kvennaleikvangi City sem tekur nokkur þúsund í sæti.

Arnór Smárason segir kvennaknattspyrnu í mikilli sókn. „Það er ágætis kaliber, kvennaknattspyrnan er í þvílíkri sókn. Þú sérð þetta á heimsvísu, uppselt á Camp Nou þegar Real Madrid mætti Barcelona. Ég fór á kvennaleik í Svíþjóð í vetur, 18 þúsund manns á vellinum,“ sagði Arnór um málið.

Arnar Daði telur að UEFA sé ekki að taka þessa ákvörðun til að gera lítið úr kvennafótbolta. „Það hlýtur að vera ástæða fyrir þessu, það er ekki af því bara. Þetta er ekki til að niðurlægja fótboltann, þeir vilja frekar kannski velli þar sem er uppselt. Það hlýtur að vera einhver hugsun á bak við þetta, ég efast um að UEFA sé að þessu til að gera lítið úr kvennaboltanum.“

Arnór Smárason segir að Sara Björk hafi sterka rödd eftir magnaðan feril. „Mér finnst hún hafa unnið inn fyrir því með þeim ferli sem hún hefur átt, hún fær meiri og meiri virðingu. Ein af bestu knattspyrnukonum í heimi og með platform til að koma sinni skoðun á framfæri.“