Svo gæti farið að knattspyrnuáhugamenn á HM í Katar síðar á árinu fái ekki að bera regnbogafána. Það yrði gert til að ,,verja þau“ að sögn hershöfðingjans Abdulaziz Abdullah Al Ansari.
Samkynhneigð er bönnuð í Katar og geta karlmenn fengið allt að dauðarefsingu fyrir að vera í sambandi með öðrum mönnum.
Katar hefur áður sagt að landið muni bjóða samkynhneigð pör velkomin. Þá hefur FIFA sagst ætla að leyfa regnbogafána inni á völlunum.
Nú er hins vegar sett spurningamerki við það miðað við nýjustu ummæli Al Ansari. ,,Ef ég tek regnbogafána af stuðningsmanni er það ekki vegna þess að ég vil það eða að ég vilji móðga hann. Það yrði til að verja hann. Ef ég tek fánann ekki gæti einhver ráðist á hann.“
,,Ég get ekki tryggt það að allir hagi sér. Ég myndi segja stuðningsmanninum að það sé engin þörf á að vera með fánann hér.“
Al Ansari hélt áfram. ,,Fólk ætti að tjá þessa skoðun sína í samfélagi þar sem það er samþykkt. Fólk kaupir miða til að horfa á leik, ekki undirstrika pólitíska skoðun.“
,,Horfðu á leikinn. Það er fínt. En ekki koma og móðga allt samfélagið. Við erum hér til að stýra knattspyrnumóti.Við breytum ekki lögunum. Þið breytið ekki trú fólks á 28 daga heimsmeistaramóti.“