Athygli vakti á leik Barcelona og Frankfurt í 8-liða úrslitum Evrópudeildarinnar í gær að mjög mikill fjöldi stuðningsmanna síðarnefnda liðsins var á Nývangi, heimavelli Barcelona.

Frankfurt gerði sér lítið fyrir og vann Barcelona 3-2 í mjög svo dramatískum leik. Fyrri leikur liðanna endaði með 1-1 jafntefli. Filip Kostić kom gestunum yfir úr vítaspyrnu á fjórðu mínútu og Rafael Santos Borré bætti við marki á 36. mínútu, staðan í hálfleik 2-0 Frankfurt í vil.

Kostic var ekki hættur og bætti við þriðja marki þýska liðsins með góðri afgreiðslu á 67. mínútu. Tólf mínútum var bætt við venjulegan leiktíma og Barcelona tókst að minnka muninn. Sergio Busquets minnkaði muninn fyrir Börsunga á fyrstu mínútu uppbótartíma áður en heimamenn fengu dæmda vítaspyrnu undir blálokin. Memphis Depay minnkaði muninn í 3-2 en að lokum var það Frankfurt sem fór áfram og mæta West Ham í undanúrslitum. Lokatölur í einvíginu 4-3 fyrir Frankfurt.

Um 30 þúsund stuðningsmenn Frankfurt voru á leiknum sem verður að teljast sérstakt fyrir stuðningsmenn útiliðs.

„Við bjuggumst við 70-80 þúsund stuðningsmönnum Barcelona en það var ekki þannig. Þetta var eins og úrslitaleikur með tveimur jafnstórum áhorfendahópum. Félagið er að skoða hvað gæti hafa gerst,“ sagði Xavi, stjóri Barcelona.

Forseti félagsins, Joan Laporta, tjáði sig einnig. „Þetta er synd. Þetta má ekki gerast aftur og við þurfum að fara vel yfir þetta. Ég skammast mín og þykir þetta mjög leitt.“