Albert Brynjar Ingason var gestur í þættinum Íþróttavikan með Benna Bó sem var sýndur á Hringbraut á föstudagskvöld. Albert er gamall markahrókur sem hefur nú tekið að sér hlutverk í fjölmiðlum þar sem hann hefur gert garðinn frægan í hlaðvarpsþættinum Dr. Footbal. Auk þess verður hann einn af sérfræðingum í yfirferðarþáttum um Bestu deildina í sumar.

Albert segir gaman að vera kominn þarna megin við borðið og viðurkennir að á sínum tíma sem leikmaður hafi hann fylgst vel með því hvað sérfræðingar í setti sögðu um hans frammistöðu innan vallar.

,,Jájá ég gerði það alveg og það gat alveg farið í hausinn á mér. Maður hefur séð leikmenn væla yfir því að þeir fái ósanngjarna umfjöllun í fjölmiðlum og geta eiginlega ekki tekið því.“

Albert segir leikmenn alltaf eiga rétt á því að vera gagnrýndir ef þeir eru ekki að skila sínu.

,,Höddi Magg var svolítið með mína tölfræði á heilanum, að ég gæti aldrei skorað yfir níu mörk því ég stoppaði alltaf þar. Hann bjó leigulaust í hausnum á mér á sínum tíma. Þegar að ég komst upp í níu mörk var Höddi mættur í hausnum á mér,“ sagði Albert Brynjar Ingason í Íþróttavikunni með Benna Bó en þáttinn í heild sinni má sjá hér fyrir neðan.