Knattspyrnuþjálfarinn Jón Páll Pálamason tapaði máli sínu gegn Víkingi Ólafsvík. Taldi hann uppsögn sína árið 2020 ólöglega en Víkingur ákvað að víkja honum úr starfi.
Fjallað var um málið í hlaðvarpsþættinum Dr. Football í dag en Hjörvar Hafliðason hafði þá fengið dóminn til sín.
Jón Páll gerði kröfu upp á tæpar 26 milljónir en tapaði málinu og þarf að greiða allan málskostnað í málinu.
Kröfur sem Jón Páll setti fram:
Mánaðarlegar samningsgreiðslur (26×700.000) 18.200.000
Kostnaður vegna íbúðar (26×80.000) 2.080.000
Mánaðarleg eldsneytisúttekt (26×30.000) 780.000
Mánaðarleg matarúttekt (26×30.000) 780.000
Flugmiðar fyrir maka 100.000
Bætur fyrir röskun á stöðu og högum 3.000.000
Miskabætur 1.000.000
Samtals 25.940.000
Dómurinn fellst á það með stefnda að honum hafi verið heimilt að afþakka frekara vinnuframlag stefnanda á fundi aðila 13. júlí 2020, enda er það réttur vinnuveitanda að afþakka vinnuframlag launþega ef greitt er umsamið endurgjald.
Telur dómurinn hins vegar ósannað, með vísan til þess sem rakið er hér að framan, að stefndi hafi rift samningi aðila eða sagt honum upp með ólögmætum hætti á umræddum fundi, eins og stefnandi byggir á. Er það niðurstaða dómsins að stefnandi hafi þvert á móti ekki sýnt fram á annað en að samningur aðila frá 19. október 2019 hafi verið í fullu gildi þar til stefndi sagði honum upp, 1. október 2020, samkvæmt heimild þar að lútandi í 6. gr. samningsins. Er stefndi því sýknaður af öllum kröfum stefnanda í málinu. Samkvæmt úrslitum málsins og með vísan til 1. mgr. 130. gr. laga nr. 91/1991 verður stefnanda gert að greiða stefnda málskostnað sem telst, að virtu umfangi málsins, hæfilega ákveðinn 1.500.000 krónur.
Dómsorð:
Stefndi, Knattspyrnudeild UMF Víkings, er sýkn af kröfum stefnanda, Jóns Páls Pálmasonar. Stefnandi greiði stefnda 1.500.000 krónur í málskostnað.