Forráðamenn Manchester United hafa verið að safna saman upplýsingum um það hvað félagið þyrfti að greiða hollenska úrvalsdeildarfélaginu Ajax fari svo að knattspyrnustjóri liðsins, Erik ten Hag, fari frá félaginu og taki við stjórnartaumunum á Old Trafford.
Frá þessu er greint á vefsíðu Sky Sports en Manchester United leitar nú að næsta knattspyrnustjóra liðsins sem mun taka við starfinu fyrir næstkomandi tímabil. Erik ten Hag er talinn vera ofarlega á lista hjá forráðamönnum félagsins og hefur fundað með þeim.
Ajax hefur gefið leyfi fyrir viðræðunum samkvæmt Sky Sports og hefur ekki reynt að hindra eðlilegan gang ferlisins.
Auk Erik ten Hag eru Mauricio Pochettino, knattspyrnustjóri PSG og Luis Enrique, landsliðsþjálfari Spánar einig taldir vera ofarlega á lista forráðamanna Manchester United.
