Rætt var um ársreikninga liða í Bestu deildinni í íþróttavikunni með Benna Bó sem er á dagskrá Hringbrautar öll föstudagskvöld klukkan 21. Baldur Sigurðsson, sérfræðingur um deildina sat í settinnu með Herði Snævari Jónssyni, íþróttastjóra Torgs en Hörður skrifaði áhugaverða fréttaskýringu á fimmtudag um ársreikninga undir fyrirsögninni; Miklar launahækkanir á milli ára í íslenskum fótbolta.

„Það er ýmislegt falið í þessum ársreikningum,“ sagði Hörður sem sat og skoðaði tölur nánast alla vikuna. „Launin lækka þegar Covid skellur á en það sem samt 30-40-50 milljóna króna munur á launum milli ára, þannig launin eru að hækka sem er gott og gleðilegt,“ sagði Hörður.

Bent var á að skuldir félaga væru að aukast milli ára. Af þeim knattspyrnufélögum sem hafa skilað ársreikningum fyrir árið 2021 er skuldaaukning hjá flestum. Þannig hækka skuldir knattspyrnudeildar KR um 38 milljónir króna á milli ára.

„Ég er ekki sérfræðingur í þessu. Hef aðallega verið að þiggja launin en ég bið bara um, komandi úr leikmannaheiminum, að félögin hafi reksturinn þannig að það sé hægt að standa við sína samninga.

Það er alltaf verið að spenna bogann þannig ekki koma út sem forsvarsmaður félags og segja að launin séu of há ef þú ert að taka þátt í leiknum. En þetta þýðir, með hærri launum, ættum við að fá meiri gæði á fótbolta.“

Nánari umræðu um ársreikningana má sjá hér fyrir neðan. Meðal annars um hvernig liðin skila sínum ársreikningum en það er mjög mismunandi.