Rætt var um Laugardalinn í Íþróttavikunni með Benna Bó á föstudaginn en í vikunni birtist frétt í Morgunblaðinu um að nýr þjóðarleikvangur gæti verið risinn þar á bæ á næstu fimm árum.

Bjarki Már Elísson, landsliðsmaður í handbolta, segir að það verði að passa upp á að hafa umhverfið þannig að leikmenn geti bætt sig. „Þetta gengur ekkert. Við státum okkur af því að vera fámenn þjóð með frábæra íþróttamenn og það er allsstaðar sem maður kemur, nú hef ég ferðast mikið um Evrópu, fólki finnst þetta ótrúlegt.

Þjóðverjar til dæmis skilja ekki hvernig við getum þetta. Að vera með fótboltamenn á heimsmælikvarða og gott körfubolta- og handboltalandslið. Þeir skilja þetta ekki.“

Birkir Már Sævarsson, leikmaður Vals og fyrrum landsliðsmaður í fótbolta segir að mörgu leyti hafi Laugardalsvöllurinn hjálpað landsliðinu að ná góðum árangri. „Ég held að það sé hræðilegt fyrir stórlið að koma á Laugardalsvöll, setjast niður inn í klefa og næsti maður er alveg ofan í viðkomandi af því klefinn er svo lítill. Fara svo í hræðilegar sturtur eftir æfingar og leiki. Ég held að við höfum grætt á þessu – alveg klárlega. Liðin verða svo neikvæð þegar þau sjá þetta og við töluðum oft um þetta.“

Hann bendir á að Tyrkir hafi verið sérlega slæmir að koma til Íslands að spila. „Ég held að enginn af þessum stórstjörnum nenni að mæta hingað og svo er kannski slagviðri ofan á það. Tyrkirnir til dæmis fóru alveg í mínus alltaf. Maður fann það alveg fyrir leik og maður vissi að þessi lið voru pottþétt nöldrandi og neikvæð og í ömurlegum gír.“

Hann sagði að það yrði að fara taka ákvörðun enda væri völlurinn ekki boðlegur. „Það er ekkert hægt að bjóða upp á þetta.

Klefarnir eru hræðilegir, hlaupabrautin ömurleg en einhvern veginn tókst fólkinu hérna heima að búa til ótrúlega gryfju úr þessu.“