Þeir Bjarki Már Elísson og Birkir Már Sævarsson voru gestir í Íþróttavikunni með Benna Bó á föstudaginn og ræddu þar um enska boltann. Þeir voru sammála að Liverpool standi uppi sem Englandsmeistari og segir Bjarki að fernan sé alveg möguleiki, en hann er eldheitur stuðningsmaður liðsins.
Birkir er stuðningsmaður Leeds en segir að Liverpool sé á góðu skriði og spáir að liðið komist upp fyrir Manchester City. „Það var skrýtið að sjá City gegn Palace. Það gekk ekkert að skapa færi og samt með Sterling, Gundogan og Jesus á bekknum og enginn kemur inn á.“
Bjarki bendir á að Klopp sé stórstjarna í Þýskalandi. „Þjóðverjarnir fylgjast með útaf honum. En þeir eru ekki jafn miklir stuðningsmenn og Íslendingar. Þeir eru meira að pæla í sinni deild en fylgjast með sínum mönnum.“
Birkir fékk einnig að tala aðeins um Leeds og segir að Marcelo Bielsa hafi alltaf bjargað Leeds frá falli.
Nánari umræðu um enska boltann má sjá hér fyrir neðan þar sem komið er inn á Chelsea þar sem Bjarki Már bendir á sem handboltamaður vorkenni hann leikmönnum Chelsea ekkert sérstaklega að geta ekki lengur ferðast með einkaþotum og öðrum lúxus. „Það er kannski bara fínt að jarðtengja þá aðeins.“