Esbjerg og Lyngby áttust við í Íslendingaslag í dönsku B-deildinni í kvöld.

Ísak Óli Ólafsson var í byrjunarliði Esbjerg en Sævar Atli Magnússon byrjaði hjá Lyngby. Þá er Freyr Alexandersson þjálfari síðarnefnda liðsins.

Ísak Óli fékk beint rautt spjald á 37. mínútu, skömmu eftir að Lyngby hafði komist yfir. Hann braut á Sævari Atla sem aftasti varnarmaður. Það var því á brattann að sækja fyrir heimamenn í Esbjerg frá þeim tímapunkti. Sævar Atli bætti svo við öðru marki Lyngby á 67. mínútu en liðið vann að lokum 0-3.

Aron Sigurðarson var þá í byrjunarliði Horsens í 1-4 sigri gegn Nyköping í sömu deild. Aron lék allan leikinn.

Þetta var lokaumferð á hefðbundnu tímabili B-deildarinnar. Nú verður deildinni skipt upp í tvö hluta, sex lið berjast um að fara upp um deild og sex lið um að halda sæti sínu í deildinni.

Lyngby hafnar í öðru sæti deildarinnar, Horsens í fjórða og Esbjerg í tíunda.