Arnar Bergmann Gunnlaugsson þjálfari Íslands og bikarmeistara Víkings var gestur í sjónvarpsþætti 433 á Hringbraut í gærkvöldi.

Arnar mætir til leiks í Bestu deildinni með titil að verja en lið Víkings hefur á undirbúningstímabilinu virkað í mjög góðu standi.

Miklir peningar virðast nú vera í íslenskum fótbolta og kjaftasögur um leikmenn með vel yfir milljón á mánuði heyrast nú reglulega. Arnar minntist á það í þættinum.

„Núna ertu að sjá öðruvísi dýnamík í íslenskum fótbolta, það virðist vera eins og það séu komnir peningar. Það er verið að kaupa leikmenn og fjárfesta. Valur er líklega með eitt dýrasta lið í Íslandssögunni, sem er frábært,“ sagði Arnar í þættinum.

„Deildin í sumar verður hrikalega áhugaverð, það virðist vera eins og öll lið séu að gefa í. Stuðningsmenn og stjórnarmenn séu þátttakendur í því.

Arnar reyndi að fá Aron Jóhannsson, Hólmar Örn Eyjólfsson og Orra Hrafn Kjartansson í vetur en allir völdu þeir að fara í Val .

„Við reyndum líka við fleiri leikmenn og töluðum við Orra líka. Stundum velja menn önnur lið, hvort sem það er út frá peningum eða hinn klúbburinn henti betur. Það er ánægjulegt að það séu peningar í íslenskum fótbolta.“

„Við höfum fallhlíf með Evrópukeppni en erum ekki með feitan bankareikning til að eyða eins og vitleysingar. Við þurfum að passa okkur, ég tel okkur hafa fjárfest vel,“ sagði Arnar um stöðu Víkings.

En hefur Arnar áhyggjur af því að launaskriðið sé hreinlega of mikið. „Ég ætla að vona ekki, ég ætla að vona að markaðurinn sé bara svona hjá sumum liðum sem stefna langt. Ég ætla að vona menn séu ekki að taka óþarfa áhættu,“ sagði Arnar.

Áhugavert viðtal við Arnar er í heild hér að neðan.