Sævar Pétursson, framkvæmdarstjóri KA og frambjóðandi til formannsembættis KSÍ var gestur í þættinum 433.is í gærkvöldi. Sævar hefur ákveðið að bjóða sig fram til formanns sambandsins og segist hafa hugsað sig vel og vandlega um áður en hann tók ákvörðunina. Hann vill meðal annars efla tenginguna á milli KSÍ og aðildarfélaga sambandsins og taka á rekstri sambandsins.

,,Ég hugsaði þetta í þónokkra daga og fór fram og tilbaka. Ástæðan fyrir framboðinu fyrst og fremst er sú að mér finnst þetta spennandi hlutverk að stíga fram og leiða knattspyrnuforystuna. Ég átti gott samtal við fjölskyldu mína, vini, vandamenn og aðila innan úr hreyfingunni sem hvöttu mig áfram og þetta var niðurstaðan,“ sagði Sævar Pétursson í þættinum 433.is í gærkvöldi.

Í málaskrá Sævars sem send var samhliða fréttatilkynningu til fjölmiðla um framboð hans segir að hann vilji ,,setja fótboltann aftur í fyrsta sæti.

,,Ég hef mikla skoðun á þessum málum en þetta verður ekki einungis undir mér komið verði ég formaður. Ég mun svo sannarlega tala fyrir því og tel okkur þurfa að fara ofan í grunninn. Skoða mótafyrirkomulag, lengja mótin kvenna megin og í neðri deildunum, endurhugsa unglingamótin okkar þar sem við erum að dragast rosalega mikið á eftir nágrannalöndum okkar,“

Þá vill hann einnig efla samskiptin á milli KSÍ og aðildarfélaga sambandsins.

,,Mér finnst samskiptin á milli Knattspyrnusambands Íslands og aðildarfélaganna þurfa að vera meiri. Á sama tíma geri ég mér grein fyrir því að það hefur verið töluvert mikið álag á starfsfólki KSÍ og þá sérstaklega undanfarin tvö ár. Það þarf að koma sterkari tenging þarna á milli og ég vil standa fyrir það í mínu framboði að eiga nánara samtal við félögin þannig að það sé þarna sterkari lína á milli heldur en hefur verið,“ sagði Sævar Pétursson, frambjóðandi til formannsembættis KSÍ í þættinum 433.is í gærkvöldi.

Viðtalið við Sævar má sjá í heild sinni hér fyrir neðan: