Martin Dubravka, markvörður Newcastle, hafnaði því að ganga til liðs við Manchester United í janúarglugganum. Hefði hann verið hluti af skiptidíl þar sem Newcastle vildi fá Dean Henderson, markvörð Man Utd, í staðinn. Manchester Evening News segir frá þessu.
Newcastle vildi fá Henderson í sínar raðir til að standa í rammanum út þessa leiktíð. Í staðinn hefði Dubravka sömuleiðis verið lánaður á Old Trafford út tímabilið.
Hinn 33 ára gamli Dubravka vildi þó heldur halda sæti sínu sem aðalmarkvörður Newcastle en að setjast á bekkinn fyrir aftan David De Gea hjá Man Utd.
Henderson er 24 ára gamall og hefur barist við De Gea um stöðu aðalmarkvarðar frá því á síðustu leiktíð. Honum hefur tekist að brjóta sig inn í byrjunarliðið við og við en er þó yfirleitt markvörður númer tvö.
Henderson átti góðu gengi að fagna með Sheffield United leiktíðina 2019-2020 í ensku úrvalsdeildinni.