Antonio Conte, knattspyrnustjóri Tottenham, greindi frá því á blaðamannafundi í dag að hann hefði hitt Christian Eriksen, leikmann Brentford, fyrir tilviljun á hóteli á dögunum. Conte og Eriksen störfuðu saman hjá Inter á sínum tíma og Conte segir möguleika á því að Eriksen gangi á ný til liðs við Tottenham.
Conte segist hafa verið hissa á að Eriksen hafi samið við Brentford en hann skrifaði undir sex mánaða samning við félagið. Eriksen er að vinna að því að koma sér aftur í leikform eftir að hafa farið í hjartastopp og hnigið niður í leik með danska landsliðinu á EM á síðasta ári.
,,Ég var heppinn að hitta hann á sunnudaginn og það var gott að tala við hann. Ég verð fyrstur til að verða ánægður þegar hann fer að spila á ný, við áttum mjög góðan tíma saman hjá Inter á sínum tíma,“ sagði Conte á blaðamannafundi í dag.
Conte lokaði ekki á möguleg félagsskipti Eriksen til Tottenham eftir tímabilið.
,,Ég óska honum alls hins besta með framhaldið. Maður veit aldrei hvað getur gerst, það væri gott fyrir mig að fá að vinna með honum aftur,“ sagði Antonio Conte, knattspyrnustjóri Tottenham á blaðamannafundi í dag.