Jurgen Klopp, knattspyrnustjóri Liverpool, hefur rætt við Mohamed Salah, lykilleikmann liðsins, sem er kominn aftur til Liverpool eftir að hafa verið fjarverandi með egypska landsliðinu í Afríkukeppninni.

Klopp segir Salah auðvitað vonsvikinn eftir tap í úrslitaleiknum gegn Senegal.

,,Hann hlakkar hins vegar til komandi tíma með Liverpool. Ég ræddi við hann og það fyrsta sem hann sagði mér var ‘ég er klár í slaginn’,“ sagði Klopp á blaðamannafundi Liverpool fyrir leik liðsins gegn Leicester City á fimmtudaginn.

,,Hann er reyndur leikmaður og líkamlega séð er hann skrímsli, en við verðum að sjá til hvað gerist. Hann mun að sjálfsögðu þurfa smá endurheimt í dag og síðan sjáum við til hvernig honum líður á morgun,“ sagði Klopp.

Klopp sagði að ef Salah líður vel þá sjái hann ekki ástæðu til þess að spila honum ekki. Hann komi til greina að spila leikinn á fimmtudaginn.