Ásgrímur Helgi Einarsson, fyrrum formaður knattspyrnudeildar Fram, hefur ákveðið að bjóða sig fram til stjórnar KSÍ. Frá þessu greinir Ásgrímur í færslu á samfélagsmiðlinum Facebook í dag.
Ásgrímur var kjörinn í stjórn KSÍ til bráðabirgða á aukaþingi sambandsins í október á síðasta ári.
Yfirlýsing Ásgríms:
Þar sem fjölmiðlar eru greinilega farnir að kanna hverjir ætli að bjóða sig fram í stjórn KSÍ á komandi þingi, hef fengið 2 símtöl í morgun, þá hef ég tekið þá ákvörðun að gefa kost á mér í stjórn KSÍ til næstu tveggja ára.
Ég vill leggja mitt af mörkum fyrir knattspyrnuna í góðu samstarfi við félögin í landinu. Ég hef víða komið að málum, hef talsverða þekkingu úr grasrótinni og rekstri og stjórnun félaga. Ég er sannfærður um að sú reynsla muni nýtast í hinum mörgu verkefnum sem knattspyrnuhreyfingin þarf að vinna að.
Knattspyrna er mitt hjartans mál og á þeim stutta tíma sem ég hef setið í stjórn KSÍ hef ég kynnst starfinu og myndað mér skoðun á því hvað það er sem þarf að gera til að gera knattspyrnuna í landinu enn betri. Við höfum tekið á og komið þeim málum sem upp komu í ferli og í þeim málum þarf að halda áfram að vinna.
Við megum hins vegar ekki gleyma fótboltanum sjálfum og þar þurfum við að hlúa að grasrótinni. Á ég þá ekki bara við okkar ungu iðkendur heldur líka tengd störf svo sem starf sjálfboðaliða og dómara. Sjálfboðaliðarnir eru hreyfingunni ómetanlegir sem og dómarar en dómarar hafa setið á hakanum hvað varðar fjölgun og utanumhald. Við þurfum að hlúa vel að uppbyggingu og umgjörð landsliðanna okkar, bæði kvenna og karla og einnig að aðstoða félagsliðin okkar við að ná árangri í Evrópu. Síðast en ekki síst er það mín skoðun að niðurstaða varðandi þjóðarleikvang þurfi að koma sem fyrst og það mál þarf að vinna í samráði með öðrum sérsamböndum, bæjarfélögum og ríki.
Ég hef bæði vilja og metnað til að leggja mitt af mörkum. KSÍ er að mínu mati hreyfing sem sameinar og þjónustar félögin í landinu og það er mikilvægt að styrkja fagmennsku og ímynd sambandsins. Starfssemina þarf að straumlínulaga, verkefni stjórnar eru mörg og flókin og við þurfum að vekja aftur traust og trú almennings á hreyfingunni.
Ég tel mig hafa reynslu, kraft og vilja til að takast á við þessi verkefni innan stjórnar KSÍ.
