Florentino Perez, forseti Real Madrid, er að sögn spænska miðilsins Marca ákveðinn í því að fá Kylian Mbappe og Erling Braut Haaland til liðsins næsta sumar.
Mikil spenna ríkir fyrir næsta félagsskiptaglugga en talið er að nokkrar af stærstu stjörnum fótboltaheimsins munu færa sig um set en þar er helst að nefna Kylian Mbappe og Erling Braut Haaland.
Kylian Mbappe á aðeins fjóra mánuði eftir af samningi sínum við PSG og hann hefur ekki viljað skrifa undir framlengingu. Mbappe hefur ekki farið leynt með það að draumur hans er að spila fyrir Madrid og telja spænskir fjölmiðlar að hann sé nú þegar búinn að semja um kaup og kjör við spænska félagið.
Í frétt Marca í morgun segir að Florentino Perez hafi verið að skoða bókhaldið hjá spænska klúbbnum og telur að það sé meira en nóg peningur til hjá félaginu að fá báðar stjörnunar til liðsins. Félagið er talið vera tilbúið að punga út 84 milljónum punda árlega í laun til þessara stjarna með því að losna við Marcelo, Gareth Bale, Eden Hazard og Isco af launaskrá.