Fegurðardrottningin og athafnakonan Linda Pétursdóttir skrifar áhugaverðan pistil á Facebook síðu sína í dag vegna kjörs formanns á ársþingi KSÍ. Linda er systir Sævars Péturssonar sem er í framboði til formanns.
Formaður KSÍ verður kjörinn síðar í dag en Sævar er í samkeppni um stólinn, Vanda Sigurgeirsdóttir sækist einnig eftir starfinu en hún er sitjandi formaður.
„Hann er nútímamaður, alinn upp í jafnrétti og hæfur til að taka erfiðar ákvarðanir. Hann er fylginn sjálfum sér og málstaðnum. Hann þekkir rekstur aðildarfélaga og baslið sem getur fylgt því að reka íþróttafélög, og er þar með frábær talsmaður hreyfingarinnar. Hann hefur mikla ástríðu fyrir fótbolta og hefur helgað íþróttum líf sitt. Sævar er alvanur að vinna með konum, en hann vann innan um og með konum í Baðhúsinu í mörg ár,“ skrifar Linda í færslu sinni um Sævar.
Linda segir að ódýr taktík hafi verið notuð á Sævar undanfarna daga í aðdraganda kjörsins. „Í gær birtist grein á DV með fyrirsögninni „Áhrifafólki í fótboltanum blöskrar orðræðan í garð Sævars“. Ég er sammála því að þetta er ódýr taktík en að sama skapi vil ég segja við bróður minn: „Mundu bróðir, að þetta kallast velgengnisskattur.“
Pistill Lindu í heild:
Hann er nútímamaður, alinn upp í jafnrétti og hæfur til að taka erfiðar ákvarðanir. Hann er fylginn sjálfum sér og málstaðnum. Hann þekkir rekstur aðildarfélaga og baslið sem getur fylgt því að reka íþróttafélög, og er þar með frábær talsmaður hreyfingarinnar. Hann hefur mikla ástríðu fyrir fótbolta og hefur helgað íþróttum líf sitt. Sævar er alvanur að vinna með konum, en hann vann innan um og með konum í Baðhúsinu í mörg ár.
Hann er ljúfmenni, konum stafar ekki ógn af honum og hann er sannur leiðtogi. Sama hvort það eru karlar, konur eða börn sem hann er að stýra.
Fyrir utan gífurlega reynslu úr íþróttum þá er hann með framúrskarandi menntun í starfið.
• Stúdent af íþróttabraut, framhaldskólinn á Laugum.
• Íþróttafræði frá háskóla á N-Sjálandi.
• B.s í viðskiptafræði, frá Bifröst.
• Diploma í opinberri stjórnsýslu frá HÍ.
• Meistarapróf í skattarétti og reikningshaldi frá lagadeild HÍ.
Sævar hefur hæfileika, menntun og þekkingu til að vera fyrirmyndar formaður KSÍ.
Í gær birtist grein á DV með fyrirsögninni „Áhrifafólki í fótboltanum blöskrar orðræðan í garð Sævars“. Ég er sammála því að þetta er ódýr taktík en að sama skapi vil ég segja við bróður minn: „Mundu bróðir, að þetta kallast velgengnisskattur.“
Og að lokum:
Sævar er betri en ég í öllum íþróttum, en ég mala hann alltaf í Trivial.
