Kaya Kaynak, blaðamaður á football.london, hefur útskýrt hvað átti sér stað þegar Granit Xhaka, miðjumaður Arsenal, virtist neita að taka við fyrirliðabandinu hjá liðinu í gær. Hann segir að fjölmiðlar hafi rangtúlkað atvikið.

Eddie Nketiah kom inn á sem varamaður fyrir Alexandre Laczette, fyrirliða Arsenal, á 84. mínútu í 2-1 sigri gegn Brentford í gær. Sá síðarnefndi rétti honum fyrirliðabandið. Nketiah reyndi svo að koma því á Xhaka en hann virtist neita að taka við því. Svo fór að lokum að Nketiah rétti Kieran Tierney bandið.

,,Svo það sé á hreinu þá vildi Lacazette koma bandinu á Tierney. Hann var að undirbúa sig undir að taka innkast og heyrði ekki þegar Lacazette kallaði,“ skrifaði Kaynak á Twitter.

Hann hélt áfram. ,,Þess vegna rétti Lacazette Eddie (Nketiah) bandið og átti hann að rétta Tierney það. Nketiah hafði hins vegar verið sagt að halda stöðu (frammi). Nketiah ætlaði því að rétta Xhaka bandið og átti hann að rétta Tierney það. Þá var leikurinn hins vegar að fara af staða og Xhaka sagði Nketiah að hafa það áfram. Þetta snerist ekki um að Xhaka vildi ekki taka ábyrgð.“

Xhaka var eitt sinn fyrirliði Arsenal en hann missti bandið árið 2019 eftir að hafa átt í útistöðum við stuðningsmenn félagsins. Síðan þá hefur hann þó nokkrum sinnum borið bandið þrátt fyrir að vera ekki aðalfyrirliði.