Salernitana og AC Milan skildu jöfn í lokaleik dagsins í Serie A, efstu deild ítalska boltans.
Junior Messias kom gestunum frá Mílanó yfir strax á 5. mínútu. Federico Bonazzoli jafnaði fyrir heimamenn eftir tæpan hálftíma leik.
Milan Djuric kom Salernitana yfir á 72. mínútu en stuttu síðar bjargaði Ante Rebic stigi fyrir AC Milan. Lokatölur 2-2. Dýrkeypt stig í súginn fyrir topplið Milan. Liðið er með 2 stiga forskot á Inter sem á nú tvo leiki til góða.
Fyrr í dag gerðu Roma og Verona 2-2 janftefli í Róm. Gestirnir leiddu 0-2 eftir fyrri hálfleik með mörkum frá Antonin Barak og Adrien Tameze.
Tveir ungir leikmenn, Cristian Volpato og Edoardo Bove, jöfnuðu fyrir Roma í seinni hálfleik.
Jose Mourinho, stjóri Roma, fékk að líta rauða spjaldið undir lok leiksins.
Roma er í sjöunda sæti deildarinnar með 41 stig. Verona er í níunda sæti með 37 stig.