Granit Xhaka, miðjumaður Arsenal, vildi ekki taka við fyrirliðabandinu er fyrirliði liðsins, Alexandre Lacazette fór af velli í dag.

Eddie Nketiah kom inn á sem varamaður fyrir Laczette á 84. mínútu í 2-1 sigri gegn Brentford í dag. Sá síðarnefndi rétti honum fyrirliðabandið.

Nketiah reyndi svo að koma því á Xhaka en hann virtist neita að taka við því.

Xhaka var eitt sinn fyrirliði Arsenal en hann missti bandið árið 2019 eftir að hafa átt í útistöðum við stuðningsmenn félagsins. Síðan þá hefur hann þó nokkrum sinnum borið bandið þrátt fyrir að vera ekki aðalfyrirliði.

Í dag vildi hann hins vegar ekki taka við bandinu. Nketiah fór með það til Kieran Tierney í staðinn og sá tók glaður við því.

Einhverjir stuðningsmenn Arsenal telja þetta vera vísbendingu um að Tierney sé næsti fyrirliði Arsenal. Lacazette er líklega á förum í sumar.