Manchester City tók á móti Tottenham í stórleik í ensku úrvalsdeildinni í kvöld.
Dejan Kulusevski kom gestunum yfir strax á 4. mínútu leiksins eftir góðan undirbúning Heung-Min Son.
Spurs hélt meisturunum svo í skefjum þar til á 33. mínútu. Þá skoraði Ilkay Gundogan eftir mistök frá Hugo Lloris í marki Tottenham.
Staðan í hálfleik var 1-1.
Eftir tæpan klukkutíma leik tóku gestirnir forystuna á ný með marki frá Harry Kane. Hann skoraði af stuttu færi eftir fyrirgjöf Son.
Þegar stundarfjórðungur lifði leiks hélt Kane svo að hann væri að klára leikinn fyrir Tottenham er hann kom boltanum í netið. Kulusevski var hins vegar, með hjálp myndbandsdómgæslu, dæmdur rangstæður í aðdragandanum.
Í uppbótartíma fékk Man City vítaspyrnu. Bernanrdo Silva setti boltann þá í höndina á Cristian Romero. Eftir að hafa kíkt í skjáinn dæmdi dómari leiksins vítaspyrnu. Riyad Mahrez fór á punktinn og skoraði af öryggi.
Það stefndi í grátlega niðurstöðu fyrir Tottenham úr því sem komið var en þá tók Kane til sinna ráða og skoraði sigurmark leiksins með skalla eftir sendingu frá Kulusevski.
Man City sótti síðustu andartök uppbótartímans en tókst ekki að skora. Lokatölur óvæntur 2-3 sigur Spurs.
Tottenham er í sjöunda sæti deildarinnar með 39 stig. Man City er á toppnum með 63 stig, 6 stigum á undan Liverpool sem á þó leik til góða. Titilbaráttan er því hvergi nærri búin.