Gunnar Birgisson, íþróttafréttamaður hjá RÚV var gestur í Íþróttavikunni með Benna Bó, ásamt Herði Snævari Jónssyni, íþróttastjóra Torgs og þar var farið yfir víðan völl.

Gunnar fór meðal annars yfir undirbúning sinn fyrir lýsingar á leikjum HM og varpaði ljósi á þann góða anda sem ríkir í hópi lýsenda RÚV í kringum mótið.

,,Ég hef reynt að temja mér það að vera mættur á svæðið svona einum og hálfum klukkutíma fyrir útsendingu,“ sagði Gunnar aðspurður hvernig hann hagar undirbúningi sínum fyrir lýsingar á leikjum HM í Katar.

,,Partur af því að skila einhverri ástríðu í gegnum sjónvarpið heim í stofu er að setja sig sjálfan inn í leikinn. Ef þú hefur áhuga á því sem þú ert að fjalla um þá er líklegra að það smiti út frá sér.“

Hörður Snævar tók þá boltann á lofti og sagði lýsendur RÚV hafa staðið sig með prýði á mótinu, að sama skapi hafi umfjöllun RÚV verið góð.

,,Mest öll umfjöllun RÚV í kringum þetta mót hefur verið góð. Maður saknar aðeins co-arans í lýsingunum og af því að maður er fótbolta fíkill, þá hefði verið gaman að sjá sérfræðingana fara meira á dýptina í leikgreiningunum í setti.“

Lýsingarnar hafi verið geggjaðar til þessa.

,,Gunnar hefur komið frábærlega inn í þetta og svo má alveg hrósa Herði Magnússyni aðeins meira. Maður var hálfpartinn farinn að gleyma kallinum þó hann hafi verið í kringum Meistaradeild Evrópu hjá Viaplay. Þjóðin er að uppgötva sinn gamla mann aftur.“

Gunnar tók undir það og hrósaði um leið restinni af lýsendateymi RÚV í kringum HM, þeim Einari Erni Jónssyni og Þorkeli Gunnari Sigurbjörnssyni.

,,Menn virðast pæla mjög mikið í því hver er að lýsa hvaða leik og hvernig hann gerir það. Við höfum allir fjórir mjög mismunandi stíla.

Þorkell og Einar eru mjög miklir íslensku menn og ég hef lært alveg gífurlega mikið af þeim.“

Umræðuna í heild sinni má sjá hér fyrir neðan: