Því var haldið fram í hlaðvarpsþættinum Dr. Football í dag að Valur hafi undanfarið verið að bjóða í Eið Aron Sigurbjörnsson.
Eiður yfirgaf Val fyrir sumarið 2021 og gekk í raðir uppeldisfélagsins en samkvæmt Hjörvari Hafliðasyni hefur Valur nú reynt að endurheimta Eið.
„Þeir buðu Guy Smit með, Eyjamenn sögðu takk en nei takk,“ sagði Hjörvar um stöðu mála.
Guy Smit er markvörður sem kom til Vals frá Leikni fyrir tímabilið en er nú til sölu hjá Val. Valur fékk Frederik Schram á miðju sumri sem hefur tekið stöðuna.
Eiður Aron er 32 ára gamall og flutti með fjölskyldu sína til Vestmannaeyja aftur fyrir tveimur árum. Hann var einn besti varnarmaður Bestu deildarinnar í sumar hjá ÍBV.
Valur er að reyna að styrkja hóp sinn en Arnar Grétarsson tók við þjálfun liðsins á dögunum.