Írönsk yfirvöld eru sögð hafa hótað fótboltalandsliði sínu og fjölskyldum leikmanna fyrir leikinn gegn Bandaríkjunum á Heimsmeistaramótinu í Katar í kvöld.

Mótmælaalda hefur verið í Íran undanfarið í kjölfar þess að hin 22 ára gamla Mahsa Amini lést í haldi siðgæðislögreglu þar í landi.

Leikmenn íranska liðsins hafa stutt mótmælin og fyrir leikinn gegn Englandi í fyrstu umferð riðlakeppni HM sungu þeir til að mynda ekki með þjóðsöngnum.

Í gær sagði CNN frá því að fjölskyldum írönsku leikmannanna hafi verið hótað með fangelsisdóm og pyntingum ef leikmenn haga sér ekki fyrir leikinn gegn Bandaríkjunum.

Íran á enn séns á að komast áfram fyrir lokaleik riðlakeppninnar gegn Bandaríkjunm. Liðið er í öðru sæti B-riðils með þrjú stig, stigi á eftir Englandi.

Bandaríkin eru í þriðja sæti með tvö stig og Wales í því neðsta með eitt.