Bergsveinn Ólafsson, hlaðvarsþáttastjórnandi, fyrirlesari og doktorsnemi í sálfræði, fór yfir knattspyrnuferil sinn í hlaðvarsþættinum Chess After Dark nýlega.
Bergsveinn er uppalinn hjá Fjölni. Hann gerði garðinn einnig frægan hjá FH og varð Íslandsmeistari með félaginu. Kappinn lagði skóna á hilluna aðeins 27 ára gamall, þá á mála hjá uppeldisfélaginu.
Þessi fyrrum varnarmaður segir tilfinningarnar stundum hafa hlaupið með sig í gönur á knattspyrnuvellinum. Átökin voru þó yfirleitt skilin eftir þar.
„Það er eitthvað fallegt við það að geta bara baunað yfir liðsfélaga þinn inni á vellinum og skilja það eftir þar,“ segir Bergsveinn í þættinum.
Svo var þó ekki í öllum tilfellum, eins og sýndi sig á æfingu með FH í eitt skiptið.
„Ég hef verið kýldur á æfingu. Það er eina skiptið sem ég var reiður lengur, í svona sólarhring. Böddi Löpp (Böðvar Böðvarsson), helvítið á honum, ég traðkaði á löppinni hans. Hann sagði „ef þú gerir þetta aftur þá kýli ég þig.“ Ef það er eitthvað sem ég veit þá er það að ef einhver hótar mér einhverju svona þá er ég að fara að gera nákvæmlega það.
Ég fór að honum aftur og steig á hann, viljandi í þetta skiptið. Hvað gerir Böddi? Hann tekur olnboga í andlitið á mér.“
Bergsveinn var pirraður í smá tíma en ekki lengi.
„Egóið mitt kom upp. Ég hugsaði hvað þessi tittur sem væri þremur árum yngri en ég væri að rífa sig. Ég var ósáttur við hann í svona sólarhring. En Böddi er yndislegur drengur.“