Lucas Hernandez er með slitið krossband og verður ekki meira með Frakklandi á Heimsmeistaramótinu í Katar, eða félagsliði sínu á tímabilinu.
Hernandez fór meiddur af velli í sigri Frakka á Áströlum í fyrsta leik liðanna í D-riðli HM í gærkvöldi.
Leiknum lauk 4-1 fyrir Heimsmeistarana, þrátt fyrir að Ástralía hafi komist yfir.
Það var á 13. mínútu sem Hernandez fór meiddur af velli og kom bróðir hans Theo inn á í hans stað.
Nú er ljóst að Hernandez er með slitið krossband og verður ekki meira með Frökkum í Katar.
Ofan á það missir hann af restinni af tímabilinu með félagsliði sínu, Bayern Munchen.
Frakkar eru á toppi D-riðils með þrjú stig eftir fyrstu umferðina. Danir og Túnis eru einnig í riðlinum en þau gerðu markalaust jafntefli í gær.