Fyrr í mánuðinum var greint frá því í norskum fjölmiðlum að erlent félag hafi boðið háa upphæð í Patrik Sigurð Gunnarsson. Hann hefur nú tjáð Fréttablaðinu að tilboðið hafi komið frá Belgíu.
Tilboðið barst Viking í kringum Evrópuleiki sem Patrik heillaði mikið í á þessari leiktíð.
„Þetta er klúbbur sem er búinn að standa sig vel og spila í Evrópu. Þetta var spennandi. Tilboðið var veglegt en þetta var kannski ekki rétti tímapunkturinn fyrir Viking til að selja,“ segir Patrik í ítarlegu viðtali við Fréttablaðið.
Patrik skildi félag sitt vel að hafa hafnað tilboðinu á þessum tímapunkti.
„Þegar tilboðið kom var ég ekki mikið að velta mér upp úr þessu því við vorum í miðri undankeppni Evrópu. Mér var búið að ganga mjög vel og þetta var bara góð viðurkenning fyrir mig.“