Sigurður Heiðar Höskuldsson var fyrr í dag kynntur sem nýr aðstoðarþjálfari karlaliðs Vals. Hann yfirgefur Leikni Reykjavík, en það var komið á hreint áður en nýafstöðnu tímabili í Bestu deildinni var lokið.
Það varð ljóst þegar fjórar umferðir voru eftir af úrslitakeppni Bestu deildarinnar að Sigurður myndi yfirgefa Leikni. Því var svo haldið fram að hann væri að gerast aðstoðarþjálfari Vals, sem í dag var svo staðfest.
Leiknir féll úr efstu deild að úrslitakeppninni lokinni og er Sigurður nú horfinn á braut.
Hann sér ekki eftir því að hafa tilkynnt leikmönnum að hann væri á förum, þó svo að tímabilinu hafi ekki verið lokið.
„Tilkynningin var gerð í heiðarleika og einlægni með hag klúbbsins í fyrirrúmi. Svo var því snúið upp í eitthvað rugl fyrir utan klúbbinn,“ segir Sigurður við Fréttablaðið.
„Það var allt gert til að vera hreinskilinn og fyrir hag klúbbsins, að þeir hefðu þá mögulega lengri tíma til að ráða eftirmann og ekki missa af einhverju sem hefði svo ekki verið laust í lok tímabils.“
Nánar er rætt við Sigurð um nýtt starf í Fréttablaðinu.