Eins og flestir vita fór Cristiano Ronaldo í umdeilt viðtal við Piers Morgan á dögunum.
Þar gagnrýnir hann marga hjá félagi sínu, Manchester United, þar á meðal knattspyrnustjórann Erik ten Hag.
Fyrri hluti viðtalsins birtist í heild í gær. Þar gagnrýnir Ronaldo meðal annars unga leikmenn United, sem hann telur ekki að muni eiga langa knattspyrnuferla.
„Ég vil leiða með fordæmi. Ég er líklega sá fyrsti til að mæta og síðasti til að fara heim,“ segir Ronaldo.
„Þeir hlusta á það sem þú segir en tveimur mínútum seinna eru þeir farnir að gera það sem þeir telja að sé betra.
Ég vil leiða með fordæmi. Sumir elta mig, en það eru ekki margir.“
Ronaldo sér ekki fyrir sér að margir ungir leikmenn United muni ná langt.
„Þeim er alveg sama. Jú kannski einhverjum. Það kemur mér samt ekki á óvart og ég held að þeir muni ekki eiga langa ferla. Það er hægt að telja það á fingrum annarar handar hversu margir af þessari kynslóð munu ná hæsta stiginu.“
Ronaldo var spurður út í það hvaða leikmenn væru að leggja sig fram eins og þarf hjá United.
„Diogo Dalot er ungur en mikill atvinnumaður. Hann verður lengi að. Svo er það Lisandro Martinez. Casemiro, hann er auðvitað kominn yfir þrítugt.“
