Arnar Þór Viðarsson, þjálfari A-landsliðs karla, var í viðtali við vefsjónvarp KSÍ í aðdraganda vináttulandsleiksins við Suður-Kóreu í Seúl á morgun.
Þetta er annar leikur Íslands í þessu verkefni, en liðið tapaði fyrir Sádi-Arabíu, 1-0, á sunnudag.
„Við búumst við mjög erfiðum leik. Við vitum að hópurinn sem þeir eru að vinna með núna er að mestu leyti skipaður leikmönnum sem er að fara á HM,“ segir Arnar.
„Þeir eru með feykisterkt lið, eins og við fengum að kynnast í janúar. Við búumst við leik á móti liði sem er mjög vel drillað, gott pressulið.“
Ísland og Suður-Kórea mættust einnig í janúar á þessu ári en þá töpuðu strákarnir okkar 5-1. Þá var lið Íslands, líkt og nú, töluvert breytt frá því sem er vanalega.
„Við viljum læra af leiknum í janúar. Margir leikmenn sem voru með okkur þá eru með okkur núna. Þetta er mjög gott tækifæri til að sjá hvort við höfum bætt okkur á þessum mánuðum.“
Níu klukkustundum munar á Íslandi og Seúl. Arnar var spurður út í hvort það hefði áhrif.
„Það má svosem aldrei verða nein afsökun. Þetta er bara hluti af þessu landsliðsumhverfi og þegar við erum að fara í stór verkefni og stóra leiki getur það verið í öðrum heimsálfum.“
Arnar vill gefa sem flestum leikmönnum tækifæri.
„Við munum gera einhverjar breytingar. Það voru valdir 23 leikmenn í þetta verkefni og við reynum að láta sem flesta leikmenn fá sem flestar mínútur. Það er hluti af þessu líka.“
Hér að neðan má sjá viðtalið í heild.