Logi Tómasson, leikmaður Íslands og bikarmeistara Víkings, er gestur í nýjasta sjónvarpsþætti 433.is. Þar var tónlistarferill hans meðal annars til umræðu.

Bakvörðurinn skaust fram á sjónarsviðið árið 2019 sem bæði knattspyrnu- og tónlistarmaður. Í kjölfarið fór af stað umræða um að of mikil áhersla færi á tónlistarferil Loga og að hann bitnaði á knattspyrnunni.

„Ég ákvað fyrir þetta tímabil að ég ætlaði að setja allan fókus á fótboltann. Víkingar settu traust á mig, ég var svona eini hreini vinstri bakvörðurinn hjá þeim,“ segir Logi í þættinum.

Hann var látinn vita fyrir tímabil að hann yrði fyrsti kostur í vinstri bakverðinum.

„Ég ætlaði bara að gera það hundrað prósent og sýna hversu góður ég væri því ég vissi að ég gæti átt gott tímabil.“

Logi var spurður út það hvernig hann sæi framtíðina fyrir sér í tónlistinni.

„Ég hef ekkert spáð í því nýlega. Ég get gert tónlist þegar ég vil. Eftir tíu ár, þrjú ár eða þegar ég er hættur í fótbolta, þá get ég alltaf tekið upp tónlistina aftur. En eins og staðan er í dag er ég að einbeita mér að fótboltanum og að ná lengra í honum.“

Hér að neðan má sjá þáttinn í heild.