Óskar Örn Hauksson leikmaður Stjörnunnar gæti verið á leið frá félaginu ef marka má orðróm og leigubílasögur í knattspyrnuheiminum.
Þannig hefur Óskar verið orðaður við endurkomu heim til Njarðvíkur en sparkspekingurinn, Kristján Óli Sigurðsson segir fleiri lið í baráttunni. Þetta kom fram í Þungavigtinni í dag.
Óskar Örn er einn besti leikmaður í sögu fótboltans hér á landi en hann kom til Stjörnunnar frá KR fyrir ári síðan.
„Óskar er með samning en samkvæmt áreiðanlegum heimildum þá er mikið talað um Njarðvík. Hans gömlu vinnuveitendur í Grindavík eru klárir með búntið, setja hann á skipstjóralaun,“ sagði Kristján Óli.
Hann segist hafa heimildir fyrir því að Grindavík vilji fá Óskar. Hann lék með Grindavík frá 2004 til 2006 en bæði Grindavík og Njarðvík verða í Lengjudeildinni á næsta ári.
„Óskar Örn í B-deild, guð blessi varnarmenn þar. Hann er súper fit og hugsar hrikalega vel um sig,“ sagði Kristján en Óskar er 38 ára gamall.