Málefni Kjartans Henry Finnbogasonar hjá KR hafa verið til umræðu í að verða tvær vikur. KR nýtti sér uppsagnarákvæði í samningi Kjartans.
Kjartan er ósáttur hvernig staðið var að málum og KR-ingar eru ósáttir með að Kjartan hafi rætt málið opinberlega. Rúnar Kristinsson þjálfari KR beið í um viku með að ræða málið opinberlega.
„Mér fannst margt sérstakt við þetta, Rúnar var vel undirbúinn. Það hlýtur að hafa verið erfitt að bíða í níu daga til að koma með útskýringuna. Mér fannst þetta svolítið spes, hann hafði æft þetta vel og flott ræða. Hann átti bara að koma og fá viðtal á mánudeginum,“ sagði Mikael Nikulásson sparkspekingur í hlaðvarpsþættinum Þungavigtin.
Kristján Óli Sigurðsson hjá Þungavigtinni tók þá til máls og spurði hvort það væri faglegt að starfsmaður KR hefði tekið þetta dramatíska viðtal við Rúnar eftir jafntefli við Víking á mánudag.
„Má ég koma með gögn? Gæinn sem tók viðtalið við Rúnar er í vinnu hjá KR, hann er dómarastjóri KR. Þeir höfðu níu daga að æfa þetta. Ég er að spyrja, er þetta faglegt?“
Maðurinn sem Kristján á við er Hjörvar Ólafsson dómarastjóri og þjálfari yngri flokka hjá KR. „Ég er ekkert að saka Hjörvar Ólafsson um eitthvað, þetta klassar aðeins,“ segir Kristján.
Meira:
Rúnar tjáir sig eftir langa þögn – Þvertekur fyrir að hafa logið