Davíð Smári Lamude nýr þjálfari Vestra í Lengjudeild karla var gestur í íþróttavikunni hjá Benna Bó á Hringbraut á föstudagskvöld.
Davíð hefur síðustu ár unnið magnað starf hjá Kórdrengjum og komið liðinu upp úr neðstu deild upp í næst efstu deild. Eftir gott starf þar ákvað hann að taka skrefið til Vestra á Ísafirði.
Davíð hefur náð langt á stuttum tíma en Kórdrengir hófu leik í deildarkeppni á Íslandi 2017. Þá var liðið hársbreidd frá því að komast upp.
„Ég held að það hafi verið bara um mitt fyrsta tímabil í fjórðu deildinni, þá fannst mér ég hefði einhver verkfæri sem ég gæti nýtt mér í þessu. Þá byrjar maður að hugsa, ég sá kannski ekki þessa vegferð,“ sagði Davíð þegar hann var spurður um það hvenær hann hafi hugsað um að hella að sér fullri alvöru í þjálfun.
„Sem betur fórum við ekki upp á því tímabili, ég lærði mjög mikið af því.“
Hörður Snævar Jónsson, íþróttastjóri Torgs rifjaði þá upp fyrsta tímabil Kórdrengja. „Það er einn ótrúlegasti leikur sem ég hef séð þegar Kórdrengir á fyrsta tímabili voru flautaðir úr leik í undanúrslitum gegn KH. Það var dómarahneyksli eins og þau gerast best,“ sagði Hörður sem var á vellinum.
„Hann var á Hlíðarenda, það var rangstöðumark sem var aldrei rangstaða og vítaspyrna. Það voru rosa margir á vellinum.“
Davíð tók undir þetta. „Við fengum send myndbönd, maður upplifir oft á hliðarlínunni að það sé allt á móti manni og svo kemur maður heim og kíkir yfir tölfræði og sér að maður að það var kannski ekki þannig. Þarna fékk maður þetta á myndbandi svart á hvítu, við vorum flautaðir úr leik.“
Klippu af þessu má sjá hér að neðan.