Kylian Mbappe skoraði mark Paris Saint-Germain í jafntefli gegn Benfica í riðlakeppni Meistaradeildar Evrópu í gærkvöldi.
Mbappe hefur verið í umræðunni síðan í gær en hann vill fara frá PSG. Voru margir hissa þegar tíðindin brutust út í gær. Mbappe skrifaði undir nýjan samning við PSG fyrir nokkrum mánuðum.
Flestir töldu í vor að Mbappe væri að fara frítt frá PSG og væri að ganga í raðir Real Madrid. PSG bauð Mbappe hins vegar samning sem hann gat ekki hafnað.
Mbappe er launahæsti knattspyrnumaður í heimi en hann er óhress með það að þurfa að spila sem fremsti maður. Franskir miðlar segja að PSG hafi lofað Mbappe að keyptur yrði framherji í sumar.
Einnig segir að Mbappe hafi fengið það loforð um að Neymar yrði seldur. Hvorugt gerðist og nú vill Mbappe helst fara frá PSG strax í janúar.
Það er óhætt að segja að Lionel Messi, leikmaður PSG sem var í stúkunni í gær, og forseti félagsins, Nasser Al-Khelaifi, hafi ekki kippt sér mikið upp við mark Mbappe í gær. Þeir fögnuðu ekki.
Ljóst er að staðan er stirð hjá félaginu.