Jurgen Klopp, stjóri Liverpool, hrósaði Gabriel Jesus, framherja Arsenal, í hástert í aðdraganda leiks liðanna í ensku úrvalsdeildinni um helgina.

Jesus gekk í raðir Arsenal frá Manchester City í sumar og hefur byrjað afar vel. Brasilíumaðurinn hefur skorað fimm mörk og lagt upp þrjú í átta leikjum í deildinni það sem af er.

„City hefði ekki selt hann til hvaða félags sem er en Arsenal var nógu langt frá, landafræðilega séð,“ segir Klopp.

„Hann er stórkostelgur leikmaður. Maður sá það alltaf þegar hann spilaði fyrir City. Í fyrra sögðu allir að City ætti enga níu, hann var þarna.“

Klopp segir að Jesus njóti þess að fá traustið í sinni stöðu, sem fremsti maður.

„Hann spilaði oft úti á kanti með City en nú er hann í sinni stöðu. Hann er á miklu flugi og með mikið sjálfstraust. Þetta er það sem sjálfstraust gerir fyrir toppleikmenn.

Við þurfum að reyna að stoppa flugið á honum eina helgi.“

Leikur Arsenal og Liverpool hefst klukkan 15:30 að íslenskum tíma á Emirates-vellinum á sunnudag.