Það hefur skapast mikil umræða um hegðun nokkurra stuðningsmanna á bikarúrslitaleik Víkings R. og FH um helgina. Tómas Þór Þórðarson, ritstjóri enska boltans á Símanum og Víkingur, var í stúkunni og sagði frá sinni upplifun í Innkastinu á Fótbolta.net.
Víkingur varði bikarmeistaratitil sinn með 3-2 sigri í framlengdum leik. Þó nokkuð hefur verið rætt um ölvun og óspektir í stúkunni á Laugardalsvelli, þó aðeins hjá litlum hópi.
„Ég var nú heldur betur ofan í þessu fylleríi sem var í gangi, með sæti í fremstu röð á allt sem var í gangi þarna,“ segir Tómas í þættinum.
Hann segir frá drukknum manni sem sat nálægt honum á vellinum. „Það er ekki séns að hann muni hvernig þessi leikur fór og á meðan leiknum stóð er ég ekki viss um að hann hafi munað hvað hann hét. Hann var mættur með flöskur að heiman, ekki bjór flöskur heldur litlar flöskur af öðrum toga, sem er stranglega bannað. KSÍ á að sjá um leitir á mönnum en það hefur ekki verið leitað nógu vel á honum.“
Björgunarsveitin sá um gæslu á leiknum. Henni gekk hins vegar illa að hemja manninn sem um ræðir.
„Það kemur mjög kurteis og flottur strákur úr Björgunarsveitinni að þessum unga manni og bendir honum á það að þetta sé ekki leyfilegt. Þessi strákur er svolítið stór og hafði engan áhuga á því að láta hann fá flöskurnar sínar. Honum langaði að halda áfram að hella úr sér vitinu. Björgunarsveitarstrákurinn var ekki að fara í nein handalögmál við hann. Hann sagði honum að þetta væri bannað og hann yrði að taka þetta en maðurinn sagði bara nei.
Svo hélt gæinn áfram að rífa upp hverja flöskuna á fætur annari. Þetta var eins og töfrabragð. Á endanum tók ég eftir því að það var einn strákur þarna, stór, þrekinn og mikill maður sem var ekki í Björgunarsveitinni, sem leit meira út eins og dyravörður. Hann mætir upp í stúku þegar maður er að draga upp hverja flöskuna á fætur annari upp úr töskunni eins og Lalli töframaður og tekur flöskurnar af honum. Hann læsir stórum krumlum sínum utan um flöskurnar, horfir beint í augun á þessum unga fulla herramanni, rífur af honum flöskurnar og starir hann bara niður. Þar með var þetta mál leyst.“
Tómas segir að þetta sýni að KSÍ þurfi að útvega betri gæslu á stórum leikjum sem þessum.
„Þetta er gæslan sem á þarf að halda. Ekki eitthvað vinalegt spjall.“
