Phil Jones, miðvörður Manchester United, sneri aftur á völlinn eftir langa fjarveru á dögunum. Hann var í byrjunarliði í 0-1 tapi gegn Wolves í síðustu viku.
Hinn 29 ára gamli Jones átti fínan leik þrátt fyrir tapið. Hann var í viðtali á dögunum þar sem hann lýsir því hvernig það var að vera í burtu frá knattspyrnuvellinum.
,,Ég var svo lengi frá vellinum og leikmannahópnum. Þetta hefur verið hræðilegt á köflum en það er gott að vera mættur aftur með strákunum. Mér líður eins og ég sé fótboltamaður á ný,“ sagði Jones.
Stuðningsmenn Man Utd voru margir hverjir sáttir með viðhorf Jones í leiknum. Hann segist leggja sig hundrað prósent fram fyrir liðið.
,,Þegar ég klæði mig í treyjuna gef ég allt sem ég á, blóð svita og tár, fyrir félagið.“