ÍA leitar sér nú að þjálfara en Jóhannes Karl Guðjónsson lét af störfum í gær og gerðist aðstoðarþjálfari landsliðsins.
Jóhannes Karl hefur unnið gott starf hjá ÍA en ljóst er að félagið þarf að vanda valið í eftirmanni hans vel.
Tímapunkturinn er ekkert sérstakur nú þegar aðeins eru um tveir og hálfur mánuður í að Íslandsmótið fari af stað. Margir eru í starfi sem þeir losna ekki úr.
Hér að neðan eru sjö kostir sem Skagamenn gætu reynt að krækja í.
Ólafur Kristjánsson – Án starfs
Lét af störfum hjá Esbjerg síðasta sumar og hefur skoðað kosti sína síðan. Ólafur gæti hentað Skaganum frábærlega.
Eiður Smári Guðjohnsen – Án starfs
Ljóst er að það myndi kveikja neista í stuðningsmönnum ÍA að fá Eið Smára til starfa. Einn besti knattspyrnumaður í sögu Íslands gerði vel sem þjálfari FH og leitar sér nú að nýju starfi.
Jón Þór Hauksson – Þjálfari Vestra
Hefur sterka tengingu inn í félagið en fæddur og uppalinn á Skaganum og var áður aðstoðarþjálfari liðsins. Gerði vel með Vestra í fyrra.
Sigurður Jónsson – Í yngri flokkum ÍA
Þekkir allt starf félagsins út og inn, hefur daðrað við meistaraflokks þjálfun síðustu ár en þarna gæti verið hans skref.
Bjarni Guðjónsson – Framkvæmdarstjóri KR
Bjarni hætti sem aðstoðarþjálfari KR á síðasta ári og fór til Svíþjóðar en hann snéri hins vegar heim fyrir áramót og gerðist framkvæmdarstjóri KR. Gæti hann tekið við af bróður sínum?
Ejub Purisevic – Þjálfari í yngri flokkum Stjörnunnar
Þekkir Vesturlandið vel eftir mörg ár í Ólafsvík, gæti verið góður kostur fyrir ÍA en Ejub starfar í dag hjá Stjörnunni.
Guðjón Þórðarson – Þjálfari Víkings Ólafsvíkur
Rómantíkin gæti orðið allsráðandi ef Guðjón kæmi heim á Akranes, sonur hans hefur byggt góðan grunn sem Guðjón gæti byggt ofan á.