Daninn Christian Eriksen er byrjaður að æfa með varaliði Ajax til að koma sér aftur í gott form.
Eriksen fékk leyfi frá læknum í desember til að halda áfram knattspyrnuferlinum eftir að hafa lokið nokkurra mánaða endurhæfingu en hann fór í hjartastopp í leik Danmerkur og Finnlands á EM 2020.
Hann neyddist til að rifta samningi sínum við Inter Milan vegna þess að óleyfilegt er að spila með gangráð á Ítalíu.
Það er hins vegar leyfilegt á Englandi og greindu enskir miðlar frá því á dögunum að nýliðar Brentford væru nálægt því að klófesta danska miðjumanninn á sex mánaða samning.
Legends are always welcome ♥️@ChrisEriksen8 is training with Jong Ajax this week. The Danish international is working to keep his fitness levels until he finds a new club.
— AFC Ajax (@AFCAjax) January 25, 2022
Christian Eriksen varði fimm árum hjá Ajax áður en hann gekk til liðs við Tottenham árið 2013.
„Ég er mjög ánægður að vera kominn hingað. Ég þekki fólkið hjá Ajax, mér líður eins og ég sé að koma aftur heim vegna þess að ég varði svo löngum tíma hér,“ sagði Eriksen.
„Ég get æft á háu tempói í hóp hjá Jong Ajax. Það er fullkominn grundvöllur fyrir mig. Ég vil komast í mitt besta form so ég geti staðið mig vel þegar ég finn mér nýtt félag.“