Roy Keane, fyrrum leikmaður Manchester United og sérfræðingur Sky Sports um enska boltann, var nokkuð beinskeyttur í gagnrýni sinni á Tottenham eftir 2-0 tap liðsins gegn Chelsea í nágrannaslag helgarinnar í ensku úrvalsdeildinni.

Tottenham er sem stendur í 7. sæti ensku úrvalsdeildarinnar og þarf að mati Keane að styrkja leikmannahóp sinn ef liðið ætlar að berjast við efstu lið deildarinnar um sæti í Meistaradeild Evrópu en hann getur ekki ímyndað sér hvaða heimsklassa leikmenn myndu semja við Tottenham.

,,Vandamálið er hvaða topp leikmenn myndu fara til Tottenham? Þá sérstaklega í janúer eða næsta sumar ef liðið kemst ekki í Meistaradeild Evrópu. Knattspyrnustjórinn getur reynst aðdráttarafl en hann verður kominn á lokaár síns samning á þessum tíma ef hann verður yfir höfuð enn þarna,“ sagði Roy Keane á Sky Sports eftir leik Chelsea og Tottenha.

Hann segir að jafnvel þó að Conte myndi fá nægan pening til þess að fjárfesta í leikmönnum í janúar, yrði félagið samt í vandræðum.

,,Það er enginn topp leikmaður laus í janúar sem myndi vilja ganga til liðs við Tottenham,“ sagði Roy Keane.