Guðmundur Benediktsson, fjölmiðlamaður og fyrrum atvinnumaður í knattspyrnu, ræddi um son sinn, knattspyrnumanninn Albert Guðmundsson og hans stöðu hjá AZ Alkmaar í Chess After Dark á dögunum.

Max Huiberts yfirmaður knattspyrnumála hjá félaginu, staðfesti á dögunum að Albert myndi yfirgefa félagið en óvíst er hvort það verði núna í janúar félagsskiptaglugganum eða þegar að samningur hans við félagið rennur út í sumar.

Guðmundur segist ekki vita það á þessari stundu hvað verður hjá Alberti.

,,Ég veit það ekki, Albert veit það ekki, það veit enginn. En það gæti breyst á morgun, í vor eða næsta sumar. Vonandi verður eitthvað á hreinu í þessum mánuði,“ sagði Guðmundur í þættinum Chess After Dark og sagði síðan sína skoðun á málinu.

,,Ef að ég fengi að ráða frá A til Ö, þá myndi ég frekar vilja að hann færi í janúarglugganum. Staðan verður leiðinleg og erfið út tímabilið því Albert verður ekki notaður mikið. Hann neitar að skrifa undir nýjan samning og er að bíða eftir að samningurinn rennur út.“

Albert gekk til liðs við AZ árið 2018 og Guðmundur telur að hann vilji fara að prófa eitthvað nýtt.

,,Hann er búinn að vera í Hollandi í átta ár. Ég held að það sé fyrst og fremst pælingin, að honum langi að prófa eitthvað nýtt í heiminum. Ég get fullkomlega skilið það.“

Albert hefur verið orðaður við nokkur lið að undanförnu. Helst ber að nefna skosku liðin Celtic og Rangers, þá hefur hann einnig verið orðaður við ítalska liðið Lazio sem og Feyenoord í Hollandi.