Breiðablik hefur samþykkt tilboð frá Rosenborg í Selmu Sól Magnúsdóttir og hefur hún náð samkomulagi um tveggja ára samning við norska liðið.
Selma Sól er 23 ára gömul, Bliki í húð og hár og spilaði sinn fyrsta leik með liðinu í efstu deild árið 2013, aðeins fimmtán ára gömul. Síðan þá eru leikirnir orðnir 137 og mörkin 27 í öllum keppnum.
,,Selma er spenanndi miðjumaður sem getur hjálpað okkur mikið á næstkomandi tímabili. Hún var hér til reynslu í síðustu viku og þar náði hún að heilla okkur og sýna hvað í sér búð. Hún er með frábært hugarfar og mun falla vel inn í þetta hjá okkur,“ sagði Steinar Lein, þjálfari Rosenborgar um Selmu Sól.
Selma Sól hefur verið í lykilhlutverki með Blikum síðustu ár og unnið allt sem hægt er að vinna í Kópavoginum. Hún hefur jafnframt spilað sextán A-landsleiki og áður fjölda leikja með yngri landsliðum.
,,Mín fyrsta tilfinning fyrir félaginu er mjög góð. Mér finnst allt frábært við félagið og er hrifinn af því hvernig Rosenborg hefur vaxið undanfarin ár, þá eru stelpurnar í liðinu frábærar. Ég tel þetta vera rétt skref fyrir mig til þess að þróast sem leikmaður. Ég hlakka til að flytja til Þrándheims og Rosenborgar,“ sagði Selma Sól um vistaskipti sín á heimasíðu Rosenborgar.
Blikar kveðja því nú leikmanninn sem hefur þjónað þeim vel.
,,Hún lagði hart að sér að koma til baka eftir erfið meiðsli sem hún lenti í fyrir tveimur árum og það er því sérlega gleðilegt að sjá hana taka skrefið út í atvinnumennsku. Blikar óska Selmu alls hins besta í Noregi en hún hefur verið frábær liðsmaður í Kópavoginum og mikil fyrirmynd jafnt innan sem utan vallar,“ segir í tilkynningu frá Breiðablik.