Liverpool er komið í úrslitaleik enska deildabikarsins eftir sigur á Arsenal í Lundúnum í kvöld.
Heimamenn voru sprækir í upphafi leiks en Liverpool tók fljótt við sér. Diogo Jota kom þeim yfir á 19. mínútu. Þrátt fyrir að það virðist sem svo að Portúgalinn hafi ekki hitt boltann nógu vel þá lak hann framhjá Aaron Ramsdale í marki Arsenal.
Staðan í hálfleik var 0-1.
Bæði lið fengu tækifæri til að skora snemma í seinni hálfleik. Fyrst átti Alexandre Lacazette skot yfir mark Liverpool. Stuttu síðar fékk Kaide Gordon svo dauðafæri fyrir gestina en skaut sömuleiðis yfir.
Jota skoraði annað mark sitt og Liverpool á 77. mínútu. Hann fékk þá sendingu inn fyrir frá Trent Alexander-Arnold og afgreiddi boltann frábærlega í markið.
Thomas Partey nældi sér í sitt annað gula spjald og þar með rautt í lok leiks. Hann hafði komið inn á sem varamaður á 60. mínútu.
Lokatölur á Emirates-vellinum urðu 0-2 fyrir Liverpool.
Liverpool fer í úrslitaleikinn og mætir þar Chelsea þann 27. febrúar.